Menya zimwe mu mpamvu zitera abantu kugona

Menya zimwe mu mpamvu zitera abantu kugona

Umubare utari muto w’abantu ku Isi bagira ibibazo mu myanya y’ubuhumekero cyane cyane igihe basinziriye, bamwe bikabaviramo no kugona bishobora kubangamira no kubuza amahwemo abandi ntibasinzire.

 

Abanyamerika bagera kuri miliyoni 90 bahura n’ikibazo cyo kugona kandi abenshi usanga batazi impamvu ibibatera n’ingaruka bishobora kugira ku buzima bwabo.

Umuhanga mu by’ubuzima, Steven Olmos, yagaragaje ko kugona bishobora gutera ingaruka zo gutera indwara y’umutima cyangwa iyo kwangirika kw’imitsi yo mu bwonko izwi nka ’stroke’.

Inkuru ya Huffington Post yerekana ko hari uburyo ushobora kugenzura no kwitwararika ku muco wo kugona.

Izi ni zimwe mu mpamvu zishobora kuba nyirabayazana yo kuba abantu benshi bagona cyane.

1. Ukunda kunywa inzoga ku mugoroba

Inzobere mu bijyanye n’Ubuvuzi bw’indwara z’ubuhumekero yavuze ko kunywa inzoga buri mugoroba bishobora kuba imwe mu mpamvu zitera uwazifashe kugona.

Inzoga zica intege inzira yaho umwuka unyura bigatuma byatera uwazinyweye kugona mu gihe aryamye.

2. Umwuka uca mu mazuru ufite ikiwuzitira

Kugira icyo aricyo cyose cyazitira inzira y’aho umwuka uca mu mazuru ni kimwe mu byagutera kugona.

Umuganga mu bitaro bivura indwara z’amatwi, amazuru n’ingoto muri Minnesota, Brian Drew, yavuze ko kugona kandi bishobora guturuka ku kuba inzira ica mu mazuru “Spectrum” yaragize ikibazo ku buryo guhumeka neza bigorana.

3. Kuryama ugaramye

Kuryamira umugongo byongera ibyago byinshi byo kugona nkuko Marcella M. Frank, umuganga muri Deborah Heart and Lung Center muri Leta ya New Jersey yabitangaje.

Ubushakashatsi bwagaragaje ko 92% y’abahura n’ibibazo byo gusinzira nabi bakanagona bashobora kugubwa neza mu gihe bahagarika kurara bagaramye.

Bijwadia wa yavuze ko “kuryamira uruhande rw’ibumoso bigabanya ikibazo cyo kugona kubakunda guhura nacyo. Bishobora kongera umwuka mu gihe umuntu aryamye bikanarinda inzira unyuramo.”

4. Bishobora kuba biterwa n’ibiro byinshi

Kugira umubyibuho ukabije bijyana n’ibiro byinshi bishobora kongera imikaya ku ngoto no ku ijosi bikaba byavamo ingaruka zo kugona.

Bijwadia avuga ko kugabanya ibiro biri muri bimwe bishoboara kugufasha kugabanya ibyago byo kugona.

5. Thyroid ishobora kuba itagikora neza

Iyo Thyroid (igice kiri hepfo gato y’ingoto) yagize ikibazo bishobora kugira ingaruka ku nzira z’umwuka ku buryo byateza n’imbogamizi z’imihumekere umuntu aryamye.

Ubushakashatsi buvuga ko abantu bafite ikibazo cy’imisemburo myinshi baba bafite ibyago byinshi byo kugona.

Ibindi bimenyetso bigaragaza ko hari ikibazo cy’imisemburo birimo umunaniro, kumagara k’uruhu, umusatsi unyunyutse no kwiheba.

6. Ikigero cy’imyaka umuntu agezemo

Nubwo kugona bifata abantu batandukanye ahaba abana n’abantu bakuru, hari ubwo biterwa n’imyaka umuntu agezemo. Gusa, ngo imyitozo irimo no kuririmba ni imwe mu ishobora gufasha umuntu kwirinda kugona.

7. Imiterere y’umunwa wawe ishobora kuba imbarutso yo kugona

Abantu bagira imiterere itandukanye y’iminwa bishobora no kuba byatuma bagira ikibazo cyo kugona. Urugero kugira mu nkanka hato cyangwa horoshye bifunga inzira umwuka unyuramo bikaba byatera umuntu agona.

8. Kuba uri umugabo

Ubushakashatsi bwerekana ko imitandukanire y’ibitsina nayo ishobora kuba impamvu itera abantu kugona.

Urugero ni uko inzira yaho umwuka w’abagabo uca ari hato, bikaba byabaviramo kugona. Ikindi ni uko abagabo aribo banywa inzoga nyinshi kurusha abagore kandi inzoga iri mu bishobora gutera kugona.

Abahanga mu by’ubuzima bavuga ko kugona bishobora gutuma umuntu ahagarika guhumeka mu ijoro mu gihe aryamye kuko habayeho kwifunga k’umwuka unyura mu muhogo.

Bumwe mu buryo bwo kwirinda kugona harimo kutaryamira umugongo ahubwo ukaryamira inda cyangwa urubavu, kwirinda inzoga n’itabi cyane cyane nijoro no kwirinda imiti isinziriza.

Ibitekerezo (0)

Andika Icyo Ubivuga Ho